Bunaíodh Coiste CLG Chontae Chiarraí Mí na Samhna 1888. Bunaíodh Cumann Lúthchleas Gael Daingean Uí Chúis i 1891. Bhí an Cumann páirteach i gcomórtas Craoibhe nab liana sin agus i 1892, 1896, 1904 agus 1905. Na ‘Dingle Wreckers’ ainm na foirne a bhí páirteach i 1903. Ní raibh an t-ádh leis na foirne sna blianta tosaigh sin toisc nach raibh aon pháirc imeartha acu féin ag an am. D’imrítí cluichí in áiteanna éagsúla, go hairithe i Móin a’Cheapadh agus Baile an Mhuilinn.

Tá cuntas ar chluiche a himríodh i bpáirc bheag i lár an bhaile ‘An Úllord’ inniu ar Lá le Pádraig 1907 idir Daingean Uí Chúis agus Rogha an Iarthair. Ag cruinniú an Chlub ina dhiaidh sin bhí vóta buíochas don Rt. Hon. E.A. de Moleyns (deartháir le Tiarna Fionntrá) toisc gur thug sé cead dóibh an cluiche d’imirt ann. Bhí vóta buíochas eile do Bhanna Ceol Práis agus Feaga Daingean Uí Chúis as freastal ar an chluiche.

Chabhraigh toscaí éagsúla leis. Chabhraigh an Sagart Cúnta an tAthair Seoirse Ó Ceallacháin, sagart cúnta an Chlub a eagrú  arís agus tugadh ainm neamhghnách ar an bhfoireann ‘Na Gascons’. Ní fios cén fáth gur tugadh an ainm seo ortha, ach go raibh sé i gceist fir Daingean Uí Chúis a chur i gcomparáid le fir Gascony sa bhFrainc a raibh cáil ortha mar fhir téagartha láidre. Is minic go raibh iascairí as Gascony sa Daingin go minic le linn séasúr na hiascaireachta.

An chéad Uachtarán a bhí ar an Chlub ná Seosamh Ó Donnchadh agus an chéad rúnaí J.J. Ó Súilleabháin. Captaen na foirne Batt Ó Concubhair, an Meall. Bé a thug an chéad Bhonn Uile Éireann go dtí Daingean Uí Chúis. Bhíodar páirteach I gCraobh an Chontae don chéad uair i 1907. Bhíodar ar chomh scór le Crócaigh, Chill Airne dhá uair ach buadh ortha sa triú iarracht. Bhí Banna Ceoil Daingean Uí Chúis leo ag na cluichí seo.

Ba mhór an mí-bhuntáiste sna blianta tosaigh nach raibh aon pháirc imeartha ag an Chlub le haghaidh cluichí agus traenála. I mí Bealtaine 1907 fuair an Chlub ‘An Fort Field’ agus tar éis a lán oibre thar na blianta, ta sé fós in úsáid mar pháirc an imeartha ag imreoirí óga Chorca Dhuibhne. Tugtar Páirc an Ághasaigh air inniu.

Déanadh cinneadh i 1942 an ‘Fort Field’ a cheannach. Ba le Alfred S. J. Ó Cinnéide, Brí, Co. Chill Mhantáin an pháirc. Ba as Tigh an Droichid, Sráid Eoin a mhuintir. Ar 23ú Eanáir 1943 bhí an ‘Fort Field’, cúig acra agus ocht péirse i seilbh iontaobhaithe an Chlub. Tugadh Páirc an Ághasaigh air in onóir don laoch 1916 Tomás Ághas as Cinn Áird, Lios Póil. Idir 1943 agus 1946 chaith an Chlub 1,730 punt ar fhorbairt na páirce.

Thosaigh Comórtas Sraithe Daingean Uí Chúis in Earrach nab liana 1940. Bhí foirne ó cheantar traidisiúnta an bhaile páirteach – Sráid Eoin, Sráid an Grae agus An Caladh le foireann as Lios Póil agus Cill Maol Chéadair páirteach chomh maith. Lean sé ar aghaidh in 1941. De réir a chéile déanadh Sráid Grae agus An Caladh a chónascadh faoi ainm nua, Na Piarsaigh. D’fhan Sráid Eoin neamhspleách. Go dtí le déanaí bhí an sean thraidisiún seo beo le cluiche bliantúil idir Na Piarsaigh agus Sráid Eoin ar Lá Chinn Bliana.

Ní raibh ag éirí le foirne Chiarraí Thiar i gComórtas Craoibhe an Chontae go déanach ins na Tríochaidí nuair a bhuaigh foireann Dhaingean Uí Chúis an Comórtas Craoibhe i 1938. Bhuadar Craobh Chiarraí arís i 1940, 1941, 1943, 1944 agus 1948. I 1941 bhí Corn Sam Mac Uidhir, Corn an Bhóthair Iarainn agus Corn an Chontae i seilbh Chlub Daingean Uí Chúis.

Tá an cumann gníomhach i ngach Comórtas sa Chontae le 40 bonn Uile Éireann ag laochra mar Batt Ó Concubhair a bhuaigh an chéad cheann i 1909. O shin i leith bhí daoine mar Bill Dillon(Captaen  Chiarraí) i 1941,Tom ‘Gega’ Ó Concubhair (Captaen Chiarraí) i 1939 nuair a bhuaigh Ciarraí Craobh na hÉireann ag caitheamh dearg agus bán Daingean Uí Chúis, Paddy Bán Ó Brosnacháin, Seán Ó Brosnacháin, Tomás Ághas, Diarmuid O Murchú, Tomás Ó Grifín, agus níos déanaí Pól Ó Géibheannaigh, Micheál Ó Géibheannaigh agus alán eile.

Thosaigh CLG Daingean Uí Chúis mar a aithnímid inniu é nuair a déanadh comhcheangal idir Sráid Eoin agus Na Piarsaigh i 1967. An chéad Cathaoirleach Ned Ó Lochlainn. An chéad Captaen ar an bhfoireann Micheál Ó Slatara.

Tá foireann sinsearach an Chlub páirteach sna Comórtais Sraithe agus Craoibhe  Chiarraí agus Comórtas Craobh na gClub an Chontae. Tá dhá foirne sinsearach eile, Foireann B i roinn a 5 agus Foireann C  páirteach i gcomórtais sraithe Sóisearach  Chiarraí. Bunaíodh Cumann Peile Ban Daingean Uí Chúis i 2010 agus tá an chlub ag fás go tapa go háirithe na foirne faoi aois.

Ghlacamar páirt sa Chomórtas sna blianta tosaigh mar pháirt de fhoireann Corca Dhuibhne agus na hÁghasaigh agus le déanaí thóg ár Foireann Sinsear páirt sa Chomórtas na bliana 2009 i Ros Muc, 2010 i mBéal an Mhuirthead agus 2012 i nGaoth Dobhair. Cé nár bhuamar bhain na himreoirí agus baill an Chumainn tairfe agus taithneamh as bheith páirteach sna cluichí agus ins na himeachtaí sóisialta agus an comhluadar agus táimíd ag súil go mór leis an Comórtas i mbliana i nGallaras.